屯馬線全走，72.8公里，仲要過兩座山，人生第一個Ultra marathon。一共用咗12個半鐘。...

屯馬線全走，72.8公里，仲要過兩座山，人生第一個Ultra marathon。一共用咗12個半鐘。過程係點，稍後剪條片俾大家睇，我只能夠講，完成嗰一刻，我忍唔住喊咗出嚟。

講真，我其實冇足夠體能完成呢件事，但我一旦決定咗要做，就唔會縮，亦唔會去後悔。

長跑最有意義嘅事，唔係訓練時間速度同體能，而係鍛練心志，亦一定會令人更瞭解自己。今日，我有足足十二個半小時可以唔理呢個世界，同自己對話。

去到美孚站，距離終點仲有四十公里，我開始抽筋，我懷疑自己可唔可以完成，然後我同自己講：「你得嘅，堅持。」

到鑽石山，我兩隻腳都抽曬筋，仲要面對登上獅子山，我冇一刻閃過放棄嘅念頭，我同自己講：「你得嘅，堅持。」

過咗大圍，仲有最後12公里，我雙腳已經痛到俾火燒咁，我問自己：「行埋佢得唔得？」「唔得，我講咗要堅持，唔係形式上，係實際上。痛都要跑埋佢。」

到馬鞍山，終點在望。全身痛到不行，我笑自己憨居，我欣賞自己憨居，我為憨居而驕傲。因為我有勇氣選擇困難嘅路，因為我有意志去堅持，因為我有能量面對一切困難。我敢講，如果冇呢啲特質，我嘅人生未必能夠繼續前行。

我明，喺跑步嘅過程，我更明。

最後一公里，土崩瓦解嘅身體突然間輕盈起來，重踏第一公里的步調，直抵終點。我又領悟到，長跑最重要的不是身體，是精神意志。又或者係，我最後一公里嘅身體，終於臣服於之前72公里嘅意志之下。

特別多謝好多 #柳仔跑會 嘅院友同行， I love you guys! 另外多謝中學同學兼跑界戰神 @ycshero 、火車Sir帶路，細Ken沿途照顧。當然唔少得搞手兼我最尊敬嘅教練王春榮，仲有沿途補給工作人員，少你地一個我都完成唔到🙏🏻

Photo credit:
@makee_snapshot @trailwalkerhenry Candy Lau

#屯馬通走2021

---